వెంకీ – మహేష్ బాబు అభిమానులే కాకుండా సాధారణ ప్రేక్షకులు ఎంతగానో ఆసక్తిగా ఎదురు చూస్తున్న చిత్రం ‘సీతమ్మ వాకిట్లో సిరిమల్లె చెట్టు’. ఫిలిం నగర్ వర్గాల తాజా సమాచారం ప్రకారం మిక్కీ జే మేయర్ సంగీతం అందిస్తున్న ఈ చిత్ర ఆడియో మెలోడితో పాటుగా వెస్ట్రన్ బీట్స్ తో పాటలు ఉన్నాయని, సినిమాకి ఆడియో హైలెట్ అవుతుందని సమాచారం. ఇప్పటికే విడుదలైన ఫస్ట్ లుక్ టీజర్ లోని పాట అందరు వినే ఉంటారు. మిగతా పాటలు కూడా అంతే అధ్బుతంగా ఉన్నాయని యూనిట్ వర్గాలు కూడా ధృవీకరిస్తున్నాయి. శ్రీ వెంకటేశ్వర క్రియేషన్స్ బ్యానర్ పై దిల్ రాజు నిర్మిస్తున్న ఈ సినిమాని మొదటగా సెప్టెంబర్లో విడుదల చేయడానికి సన్నాహాలు చేసినప్పటికీ నటీనటుల కాల్ షీట్స్ ఆలస్యం కావడం, షూటింగ్ వాయిదా పడటం వల్ల డిసెంబర్లో విడుదలయ్యే అవకశాలు ఉన్నాయి. తన మొదటి సినిమా ‘కొత్త బంగారు లోకం’ సినిమాతోనే అందరి దృష్టి తన మీద పడేలా చేసుకున్న దర్శకుడు శ్రీకాంత్ అద్దాల డైరెక్షన్లో వస్తున్న రెండవ సినిమా ఇదే కావడంతో అంచనాలు కూడా తార స్థాయిలో ఉన్నాయి. సమంతా, అంజలి కథానాయికలుగా నటిస్తున్న ఈ సినిమాలో ప్రకాష్ రాజ్, జయసుధ కీలక పాత్రలు పోషిస్తున్నారు.
