నితిన్‌ హీరోగా, రకుల్‌ ప్రీత్‌ సింగ్‌, ప్రియా ప్రకాశ్‌ వారియర్ హీరోయిన్లుగా చంద్రశేఖర్‌ యేలేటి దర్శకత్వంలో భవ్య క్రియేషన్స్‌ పతాకంపై నిర్మాత వి.ఆనంద్‌ ప్రసాద్‌ నిర్మించిన చిత్రం ‘చెక్‌’ ఈ నెల 26న ప్రేక్షకుల ముందుకు రాబోతుంది. ఈ సందర్భంగా గురువారం హైదరాబాద్‌లో ఏర్పాటు చేసిన విలేకర్ల సమావేశంలో నితిన్‌ మాట్లాడుతూ నా కెరీర్‌ గ్రాఫ్‌లో కామెడీ, ఫ్యామిలీ, యాక్షన్‌ జానర్‌ సినిమాలు చాలా ఉన్నాయని, ఈ తరహా యునీక్‌ కథతో సినిమా చేయడం ఇదే మొదటి సారి అని దర్శకుడు చంద్రశేఖర్‌ ఏలేటి చెప్పిన 15 నిమిషాల కథ విని వెంటనే ఈ సినిమాకు ఒకే చెప్పానని నితిన్ అన్నారు. అంతేకాదు ఈ కథలో ఓ ఫ్రెష్ పాయింట్‌ ‌ఉందని ఇది నాకు చాలా కొత్త కథ అని ఇప్పటి వరకు చేసిన సినిమాలు వేరు ఈ సినిమా వేరని, ‘చెక్‌’ కోసం ఫిజికల్‌గా చాలా కష్టపడ్డానని, అవుట్‌పుట్‌ చూశాక మా కష్టానికి తగ్గ ప్రతిఫలం దక్కుతుందనిపించింది. కల్యాణి మాలిక్‌ నేపథ్య సంగీతం ఈ సినిమాను మరోస్థాయికి తీసుకెళ్తుందని అన్నారు. ఈ సినిమా తప్పకుండా సక్సెస్ సాధించి మంచి వసూళ్లు రాబడుతుందని నితిన్ చెప్పుకొచ్చారు.

దర్శకుడు చంద్రశేఖర్‌ యేలేటి మాట్లాడుతూ చిన్న పొరపాటు వల్ల జీవితం తారుమారు అయిన ఓ యువకుడు తెలివితేటలతో జీవితాన్ని తన కంట్రోల్‌లోకి ఎలా తెచ్చుకున్నాడనేది ఈ ‘చెక్‌’ సినిమా కథ అని, ఇంతకుముందు నితిన్‌తో ఓ కథ అనుకుని దాని మీద పని చేశానని సెకెండాఫ్‌ వర్కవుట్‌ కాక అది వదిలేశామని అన్నారు. అయితే చెక్ సినిమాతో మళ్లీ మా ఇద్దరి కాంబినేషన్‌ కుదిరిందని నితిన్‌ను తప్ప మరో హీరోని ఆ పాత్రలో ఊహించుకోలేదని, తను లేకపోతే ఈ చిత్రం లేదని అన్నారు. ఇక కల్యాణి మాలిక్‌ అందించిన సంగీతం కూడా ఈ సినిమాకు చాలా ప్లస్‌ అవుతుందని అన్నారు.

ఈ చిత్ర నిర్మాత ఆనంద్‌ ప్రసాద్‌ మాట్లాడుతూ ఓటీటీ వేదికగా ‘ఓ పిట్ట కథ’, ‘మిడిల్‌ క్లాస్‌ మెలోడీస్‌’ చిత్రాలు విడుదల చేసిన సక్సెస్‌ అయ్యాం. ‘చెక్‌’ సినిమాతో మా సంస్థ మరో మెట్టు ఎక్కుతుంది. ఇప్పటి వరకూ నితిన్‌ని లవర్‌ బాయ్‌గా చూశామని అయితే ఈ చిత్రంతో ఎప్పుడూ చేయని ఓ చక్కని పాత్ర పోషించారని, సినిమా చూశాక అతని నటన గురించి ప్రతి ఒక్కరూ మాట్లాడుకుంటారని అన్నారు. చంద్రశేఖర్‌ ఏలేటి ఈ చిత్రాన్ని చాలా చక్కగా తీశారని, కల్యాణి మాలిక్‌ నేపథ్య సంగీతం కోసం ప్రాణం పెట్టి పని చేశారని మా సంస్థను మరో స్థాయికి తీసుకెళ్లే సినిమా చెక్ అని అన్నారు.

ఇక సాయిచంద్‌ మాటాడుతూ ఫిదా, సైరా, ఉప్పెన లాంటి అనూహ్య విజయాల తర్వాత నేను నటించిన మరో మంచి చిత్రం ‘చెక్’ అని నసీరుద్దీన్‌ షాను అనుకొని ఆ స్థానంలో నన్ను నటుడిగా తీసుకోవడం పద్మ అవార్డ్‌ అందుకున్నంత సంతోషంగానూ ఉందని అన్నారు.

సంగీత దర్శకుడు కల్యాణి మాలిక్‌ కూడా మాట్లాడుతూ హీరో నితిన్‌కు పది సినిమాలు చేస్తే వచ్చిన గుర్తింపు ఈ ఒక్క సినిమాతో వస్తుందని, తన నటన కూడా ఈ సినిమాలో చాలా బాగుందని, ఆర్‌ ఆర్‌ చేస్తున్న సమయంలో తన నటన చూసి మురిసిపోయేవాణ్ణి అని, వాటిని స్క్రీన్‌ షాట్‌ తీసి నితిన్‌కి పంపేవాడినని అన్నారు.