తెలుగు, తమిళం, మలయాళం, కన్నడ మరియు హిందీలో కూడా నటించి విలక్షణ నటుడుగా పేరు తెచ్చుకున్న ప్రకాష్ రాజ్ నిర్మాతగా మెగా ప్రొడ్యూసర్ అల్లు అరవింద్ గారి రెండవ అబ్బాయి అల్లు శిరీష్ ని పరిచయం చేస్తున్న చిత్రం ‘గౌరవం’. తాజా సమాచారం ప్రకారం ఇంకా ఈ చిత్రంలో ఒక పాటను చిత్రీకరించాల్సి ఉంది. ఈ పాట అనుకున్న టైంకి చిత్రీకరణ పూర్తయితే ఈ సినిమాని జనవరిలో విడుదల చేయాలనుకుంటున్నారు. డ్యూయెట్ మూవీస్ బ్యానర్ పై ప్రకాష్ రాజ్ నిర్మిస్తున్న ఈ చిత్రానికి గతంలో ‘ఆకాశమంత’ మరియు ‘గగనం’ లాంటి విభిన్న తరహా సినిమాలు తీసిన రాధామోహన్ దర్శకత్వం వహిస్తున్నారు. అల్లు శిరీష్ సరసన యామి గౌతమ్ కథానాయికగా నటిస్తోంది. ఒకేసారి తెలుగు మరియు తమిళంలో తెరకెక్కిస్తున్న ఈ ద్వి భాషా చిత్రానికి ఎస్.ఎస్ తమన్ సంగీతం అందిస్తున్నారు.