మెగా మేనల్లుడు వైష్ణ‌వ్‌ తేజ్ హీరోగా వస్తోన్న ‘ఉప్పెన’ సినిమాకి దేవిశ్రీ ప్రసాద్ మ్యూజిక్ అందిస్తోన్న సంగతి తెలిసిందే. కాగా ఈ సినిమా నుండి ‘నీ కన్ను నీలి సముద్రం… అనే లిరికల్ వీడియో సాంగ్ రిలీజ్ అయి సంగీత ప్రియుల హృదయాలను గెలుచుకుంది. విడుదలైన 5 రోజుల్లోనే ఈ సాంగ్ ఆదిత్య మ్యూజిక్ యూట్యూబ్ ఛానెల్‌లో 10 మిలియన్లకు పైగా వ్యూస్ ను సాధించింది. డిఎస్పీ మళ్ళీ ఈ సాంగ్ తో తానేంటో నిరూపించుకున్నాడు. మంచి ట్యూన్ తో కాస్త విభిన్నంగా సాంగ్ ను కంపోజ్ చేసి నెటిజన్లను బాగా ఆకట్టుకున్నాడు.
అలాగే దేవిశ్రీ ప్రసాద్ ట్యూన్ కి జావేద్ ఆలీ గాత్రం మరింత బలం చేకూర్చింది. శ్రీమణి సాహిత్యం కూడా సింపుల్ పదాలతో అర్ధవంతంగా ఉంది. మొత్తానికి సాంగ్ సినిమా పై అంచనాలను పెంచింది. కాగా ఏప్రిల్ 2న ఈ సినిమా విడుదల కానుంది. వైష్ణ‌వ్‌ తేజ్ తో పాటు నూతన దర్శకుడు బుచ్చిబాబు సానాను దర్శకుడిగా పరిచయం చేస్తూ మైత్రీ మూవీ మేకర్స్‌, సుకుమార్‌ రైటింగ్స్‌ సంయుక్తంగా ఈ సినిమాను నిర్మిస్తున్నాయి. అయితే విలక్షణ నటుడిగా విజయ్ సేతుపతి ఈ మూవీలో హీరోయిన్ కి తండ్రిగా అలాగే విలన్ పాత్రలో కనిపించనున్నాడట.
శ్యామ్ దత్ సినిమాటోగ్రఫీ బాధ్యతలను నిర్వహిస్తున్నారు. అలాగే ‘రంగస్థలం’ ఫేమ్ రామకృష్ణ మౌనిక ఆర్ట్ డిపార్ట్ మెంట్ ను చూసుకుంటుండగా… నవీన్ నూలి ఎడిటర్ గా చేస్తున్నారు.