‘అష్టా చమ్మా’, ‘అలా మొదలైంది’, ‘ఈగ’ సినిమాలతో మంచి నటుడిగా నిరూపించుకున్న నాని ఇప్పుడు దర్శకుల మొదటి ఎంపిక అయ్యాడు. ప్రస్తుతం కృష్ణ వంశీ ‘పైసా’, సముద్ర ఖని ”జెండా పై కపిరాజు ‘ చిత్రాల్లో నటిస్తున్నాడు .తాజాగా ‘బ్యాండ్ బాజా బారాత్’ తెలుగు రీమేక్ లో నటించనున్నాడు . భారతదేశంలోనే అగ్రగామి సంస్థ అయిన యశ్ రాజ్ స్టూడియోస్ ఈ రీమేక్ ద్వారా సౌత్ ఇండియా సినిమా పరిశ్రమలోకి ప్రవేశించనుంది. కొన్ని నెలల క్రితం ఈ చిత్రం ఒప్పుకున్న నాని ఆ సినిమా కోసం పని ప్రారంభించారు.
ఇటివలే ముంబైలో యశ్ రాజ్ స్టూడియోస్ అధిపతి ఆదిత్య చోప్రాని కలుసుకుని రాబోయే ఈ చిత్రం గురించి చర్చించారు. “ఇప్పుడే అదిత్య చోప్రా గారిని కలుసుకున్నాను. చాలా సేపు మాట్లాడుకున్నాం. అందరం చాలా ఉత్సాహంగా ఉన్నాం. నూతన ఆరంభాలు….” అని ట్విట్టర్లో పేర్కొన్నాడు. ఈ ట్రిప్ లో భాగంగా కాస్ట్యూమ్ ట్రైల్స్, ఫోటో షూట్స్ కూడా జరిగాయి. అంతేకాక అక్కడ జరిగిన మరో ఆసక్తికరమైన విషయం చెప్పాడు. ”వాళ్ళు నా కొలతలు సరిగ్గా షారుఖ్ కొలతలతో సరిపోయాయి అని చెప్పారు. నేను నా
రేమ్యునరేషన్ కుడా ఒకటే అయినా పర్లేదు అని చెప్పానని” నాని జోడించాడు. మూవీ త్వరలో మొదలుకానుంది. తారలు తదితర వివరాలు త్వరలో వెల్లడించనున్నారు.
