కొత్త నటీనటులతో మారుతి డైరెక్షన్లో రూపొందిన ‘బస్ స్టాప్’ విడుదలై వారం రోజులు పూర్తి చేసుకుని విజయవంతంగా ప్రదర్శిస్తున్న సందర్భంగా ఈ చిత్ర టీం సభ్యులు విలేఖరులతో తమ ఆనందాన్ని పంచుకున్నారు. ఈ చిత్ర నిర్మాతల్లో ఒకరైన బెల్లంకొండ సురేష్ మాట్లాడుతూ ఆ నాడు స్వర్గీయ ఎన్టీ రామారావు గారు పార్టీ స్థాపించి 8 నెలల్లో ముఖ్యమంత్రిగా అత్యధిక మెజార్టీతో గెలిచారు. ఈ నాడు మా మారుతి 8 నెలల్లో బస్ స్టాప్ సినిమా తీసి భారీ హిట్ కొట్టాడు. ఒకే సంవత్సరంలో రెండు హిట్లు ఇవ్వడం అనేది ఈ రోజు చాల అరుదు. దర్శకుడు మారుతి తన మొదటి సినిమా ‘ఈ రోజుల్లో హిట్ కొట్టి చూపించి మళ్లీ ఇప్పుడు బస్ స్టాప్ సినిమాతో రెండు వరుస హిట్లు కొట్టి చూపించాడు. ఈ సినిమాలో బూతు ఉందని కొందరు అంటున్నారు. అలంటి వాళ్ళందరికీ నేను ఓపెన్ ఛాలెంజ్ చేస్తున్నాను. ఎవరైనా ఈ సినిమాలో బూతులు ఉన్నాయని అంటే వాళ్ళకి ఈ సినిమా వేసి చూపిస్తాను. బూతులు ఎక్కడున్నాయో చూపించొచ్చు. ఈ సినిమాని తమిళ, కన్నడ భాషల్లో కూడా నిర్మిస్తాను. తమిళ్ సినిమాకి కూడా మారుతినే డైరెక్ట్ చేస్తాడు. ఈ సినిమాని ఇంత పెద్ద హిట్ చేసినందుకు తెలుగు ప్రేక్షకులకు, టీం సభ్యులందరికీ కృతజ్ఞతలు”. బస్ స్టాప్ సినిమాని శ్రీ లక్ష్మి నరసింహా ప్రొడక్షన్స్, మల్టీ డైమన్షన్ ఎంటర్టైన్మెంట్ పైవేట్ లిమిటెడ్ సంస్థలు కలిపి నిర్మించాయి.