‘శంకర్ దాదా జిందాబాద్’ సినిమా తర్వాత సినిమాలకు పూర్తిగా గుడ్ బై చెప్పి రాజకీయాల్లోకి అడుగుపెట్టిన హీరో మెగాస్టార్ చిరంజీవి. రాజకీయాల్లోకి రాక ముందు వరకూ ఆయన 149 సినిమాల్లో నటించారు. ఆయన రాజకీయాల్లోకి వెళ్ళినా అయన అభిమానులు మరియు ఇండస్ట్రీలో ఉండే ఆయన శ్రేయోభిలాషులు చిరు 150 వ సినిమా చేయాలని కోరుకుంటున్నారు మరియు ఆయన ఏ కార్యక్రమానికి వచ్చినా ఆయన్ని ఈ విషయం గురించి అడుగుతూనే ఉండేవారు. ఈ విషయం పై స్పందించిన చిరు సమయం దొరికినప్పుడు, మంచికథ కుదిరితే చేస్తానులే అని చెప్పి అభిమానుల్లో ఆశలను చిగురింపజేశారు. ఇప్పటి వరకూ ఎం.పి గా ఉన్న డా. చిరంజీవి ఇటీవలే కేంద్ర పర్యాటక శాఖా మంత్రిగా భాధ్యతలు చేపట్టారు. ఆ తర్వాత ఏర్పాటు చేసిన ఓ సమావేశంలో చిరు మాట్లాడుతూ ‘ కేంద్రం నాకు మంత్రి పదవి ఇచ్చిన తర్వాత నా భాద్యత మరింత పెరిగింది. ఇలాంటి సమయంలో నా దగ్గర సినిమాల కోసం కేటాయించేంత సమయం లేదు. కావున నా 150వ సినిమా ఇక చేయలేనేమో’ అని ఆయన అన్నారు. దీన్ని బట్టి చూస్తుంటే ఇక మెగాస్టార్ 150వ సినిమా లేనట్టే అనిపిస్తోంది. ఇది మాత్రం మెగా స్టార్ అభిమానులను చాలా బాధ పెట్టే విషయం. ఒకవేళ మెగాస్టార్ చిరంజీవి మనసు మార్చుకొని తన వెన్నంటే ఉంటూ, తన కోసం ఏమన్నా చేసే అభిమానుల కోసం మనసు మార్చుకొని 150వ సినిమా చేస్తారేమో? అనే విషయాన్ని కాలమే నిర్ణయించాలి.