వివాదాస్పద డైరెక్టర్ గా పేరున్న రామ్ గోపాల్ వర్మ చాలా చిన్న విరామం తర్వాత తన కొత్త సినిమాకి ‘సైకో’ అనే టైటిల్ లో పెట్టి వార్తల్లో నిలిచాడు. కొద్ది నెలల క్రితమే ప్రకటించిన ఈ సినిమాని జూన్ 21న రిలీజ్ చేయడానికి ప్లాన్ చేస్తున్నారు. రామ్ గోపాల్ వర్మ కథ, స్క్రీన్ ప్లే అందించిన ఈ సినిమా ద్వారా కిషోర్ భార్గవ్ డైరెక్టర్ గా పరిచయమవుతున్నాడు. కాలిబ్రే ఫిల్మ్స్ ప్రైవేట్ లిమిటెడ్ బ్యానర్ పై వివేకానంద్ అహుజ నిర్మిస్తున్న ఈ సినిమాలో నిషా కొఠారి ప్రధాన పాత్ర పోషించింది. ఈ సినిమాని సొసైటీలో ఒక మహిళ ఎదుర్కునే పలు సంఘటనలను ఆధారంగా తీసుకొని తెరకెక్కించారు.
ఈ సినిమా గురించి వర్మ మాట్లాడుతూ ‘ ఒక అమ్మాయికి తన జీవితంలో చాలా మంది అబ్బాయిలు తారసపడుతుంటారు. వారిలో కొంతమంది ఫ్రెండ్స్ అవ్వచ్చు, వారిలో ఒకరితో ఆ అమ్మాయి ప్రేమలో కూడా పడొచ్చు. అలా వారి రిలేషన్ ఒక స్టేజ్ కి వచ్చే సరికి వారిలోని ఒకరిచేత ఆ అమ్మాయి వేధింపులకి గురవుతుంది. అలా వేధించే ఓ సైకో కథే ఇది. ఆ సైకోని ఆ అమ్మాయి ఎలా డీల్ చేసింది అనేదే సినిమా’ అని తెలిపాడు.
