మెగా పవర్ స్టార్ రామ్ చరణ్ హీరోగా, మాస్ సినిమాల దర్శకుడు వి.వి వినాయక్ దర్శకత్వంలో తెరకెక్కుతున్న సినిమా ‘నాయక్’. ఈ సినిమాని 2013 జనవరి 09న సంక్రాంతి కానుకగా ప్రేక్షకుల ముందుకు తీసుకురావడానికి సన్నాహాలు చేస్తున్నారు. ఈ సినిమాలో రామ్ చరణ్ రెండు విభిన్న పాత్రల్లో కనిపించనున్నారు. ప్రస్తుతం ఇండస్ట్రీలో విస్నిపిస్తున్న సమాచారం ప్రకారం ఈ చిత్ర ఫస్ట్ లుక్ టీజర్ ని దీపావళి కానుకగా విడుదల చేయాలని అనుకుంటున్నారట. ఇప్పటికే విడుదల చేసిన కొన్ని రామ్ చరణ్ పోస్టర్లు అభిమానుల్లో అంచనాలను పెంచేశాయి. ఒకవేళ ఈ దీపావళికి టీజర్ ని విడుదల చేస్తే మాత్రం అంచనాలు తారా స్థాయికి చేరిపోతాయి. ఈ సంవత్సరం ‘రచ్చ’ తో సూపర్ హిట్ కొట్టిన రామ్ చరణ్ ఆ ఉత్సాహంతో వరుసగా సినిమాలు చేస్తూ బిజీగా ఉన్నారు. ఈ సినిమాలో కాజల్ అగర్వాల్ మరియు అమలా పాల్ రామ్ చరణ్ సరసన జోడీ కట్టారు. యూనివర్సల్ మీడియా బ్యానర్ పై డి.వి.వి దానయ్య నిర్మిస్తున్న ఈ సినిమాకి ఎస్.ఎస్ తమన్ సంగీతం అందిస్తున్నారు.