విడుదల తేదీ : ఆగస్టు 14, 2025

123తెలుగు.కామ్ రేటింగ్ : 3/5

నటీనటులు : హృతిక్ రోషన్, జూనియర్ ఎన్టీఆర్, కియారా అద్వానీ, అసుతోష్ రానా, అనీల్ కపూర్ తదితరులు.
దర్శకుడు : అయాన్ ముఖర్జీ
నిర్మాత : ఆదిత్య చోప్రా
సంగీతం దర్శకులు: ప్రీతమ్, సంచిత్ బల్హారా, అంకిత్ బల్హార
సినిమాటోగ్రఫీ : బెంజమిన్ జాస్పర్
ఎడిటింగ్ : ఆరిఫ్ షేక్

సంబంధిత లింక్స్ : ట్రైలర్ 

బాలీవుడ్ సహా టాలీవుడ్ నుంచి అవైటెడ్ గా ఉన్న భారీ మల్టీస్టారర్ చిత్రమే “వార్ 2”. మ్యాన్ ఆఫ్ మాసెస్ ఎన్టీఆర్ అలాగే హృతిక్ రోషన్ ల కలయికలో చేసిన ఈ సినిమా నేడు గ్రాండ్ గా విడుదల అయ్యింది. ఇక ఈ సినిమా ఎలా ఉందో సమీక్షలో చూద్దాం రండి.

కథ:

ఇండియన్ రా ఏజెన్సీలో నిష్ణాతుడైన ఏజెంట్ కబీర్ (హృతిక్ రోషన్) ఒక కాంట్రాక్ట్ కిల్లర్ గా మారి హత్యలు చేస్తూ ఉంటాడు. ఈ క్రమంలో చైనా, బంగ్లాదేశ్, మయన్మార్, రష్యా, శ్రీలంక వంటి దేశాలు కొన్ని చేరి ‘కలి’ పేరిట భారత్ పతనాన్ని చూడలాని ప్లాన్ చేస్తారు. ఇందుకు కబీర్ సరైన వాడు అని మెషిన్ అప్పగిస్తారు. మరి భారత్ పట్ల అమితమైన ప్రేమ కలిగిన కబీర్ తన దేశానికే ద్రోహం చేసే పరిస్థితి వచ్చినప్పుడు తనని అడ్డుకోడానికి ఒక సరైన వ్యక్తి కావాలి అలా విక్రమ్ చలపతి (జూనియర్ ఎన్టీఆర్) రంగంలోకి దిగుతాడు. ఇక అక్కడ నుంచి కథ ఎలా మలుపు తిరిగింది. విక్రమ్, కబీర్ మధ్య సంబంధం ఏంటి? భారత్ ప్రధానికి కలి వల్ల పొంచి ఉన్న ముప్పును ఎవరు ఆపారు. ఈ క్రమంలో వింగ్ కమాండర్ కావ్య లుత్ర (కియార అద్వానీ) పాత్ర ఏంటి అనేవి తెలియాలి అంటే ఈ సినిమా చూసి తెలుసుకోవాలి.

ప్లస్ పాయింట్స్:

వార్ కానీ యశ్ రాజ్ ఫిల్మ్స్ స్పై యూనివర్స్ యాక్షన్ సినిమాల లవర్స్ కి వార్ 2 కూడా యాక్షన్ పరంగా ఒక క్రేజీ యాక్షన్ ట్రీట్ అందిస్తుంది అని చెప్పడంలో సందేహమే లేదు. సినిమా ఆరంభం నుంచే ఒకదాన్ని మించి మరొక యాక్షన్ సీక్వెన్స్ అంతకు మించిన టెక్నీకల్ వాల్యూస్ తో అదిరే లెవెల్లో కనిపిస్తాయి.

అలాగే సినిమాలో పలు ట్విస్ట్ లు గాని టర్నింగ్ లు గాని మంచి సర్ప్రైజ్ చేస్తాయి. వీటితో పాటుగా అక్కడక్కడా మంచి ఎమోషనల్ సీన్ లు కూడా బాగున్నాయి. ఇక నటీనటులు విషయానికి వస్తే.. అందరి కళ్ళు ఇద్దరు హీరోస్ మీదే ఉన్నాయి. మరి అంచనాలుకి ఏమాత్రం తీసిపోని విధంగా ఇద్దరు హీరోస్ అదరగొట్టేశారు.

ఇద్దరికీ ఉన్న డిఫరెంట్ మైండ్ సెట్ తో అందుకు తగ్గ బాడీ లాంగ్వేజ్ తో అదరగొట్టారు. అయితే వార్ 1 లో హృతిక్ ని చూసాం కానీ ఇందులో మాత్రం తారక్ సర్ప్రైజ్ అని చెప్పాల్సిందే. తన ఇంటెన్స్ నటన, యాటిట్యూడ్ తన ఫ్యాన్స్ కి ట్రీట్ ఇస్తాయి. జై లవకుశ లోని రావన్ లాంటి షేడ్స్, టెంపర్ లో దయా లాంటి లుక్స్ తో కలిపితే ఎలాంటి సాలిడ్ రోల్ వస్తుందో అలాంటి పెర్ఫామెన్స్ ని తను చేసాడు.

ఇక అలాగే హృతిక్ తో క్లైమాక్స్ సీక్వెన్స్ లో ఫైట్స్ కానీ ఎమోషనల్ సీన్స్, ఇద్దరిపై బ్రోమాన్స్ సీన్స్ ఆకట్టుకుంటాయి. ఇక మరో హీరో హృతిక్ రోషన్ విషయానికి వస్తే మళ్లీ హృతిక్ తన మార్క్ ప్రెజెన్స్ తో ఇంప్రెస్ చేసారని చెప్పాలి. తన ఫ్యాన్స్ ఈ ఫ్రాంచైజ్ లో ఎలాగైతే కోరుకుంటున్నారో తను అదే రీతిలో కనిపించి మంచి ట్రీట్ అందించాడు. కొన్ని కొన్ని ఫ్రేమ్స్ లో తన స్క్రీన్ ప్రెజెన్స్ మరింత బాగుంది. అలాగే యాక్షన్ పార్ట్ కూడా అలవోకగా చేసేసాడు.

వీటితో పాటుగా ఇద్దరు నడుమ అన్ని సన్నివేశాలు మొత్తం ఇంప్రెస్ చేస్తాయి. ఇంకా కియార తన లిమిటెడ్ రోల్ బాగా చేసింది. ఫస్టాఫ్ లో మంచి యాక్షన్ సీన్స్ దక్కాయి. వీరితో పాటుగా అసుతోష్ రానా బాగా చేశారు. ఇక సర్ప్రైజ్ నటుడు అనీల్ కపూర్ కూడా బాగానే చేశారు.

మైనస్ పాయింట్స్:

ఈ సినిమాలో స్ట్రాంగ్ ఎమోషనల్ ఎలిమెంట్స్ ని కోరుకునే వారు కొంచెం డిజప్పాయింట్ అవ్వొచ్చు. ముఖ్యంగా దేశ భక్తికి సంబంధించిన అంశాలు ఒకింత లోపించాయి. ఇద్దరు హీరోస్ నడుమ ఘర్షణ బాగానే ఉంది కాని అందుకు దోహదపడే పరిస్థితులు ఇంకాస్త బలంగా కనిపించి ఉంటే ఇంపాక్ట్ మరోలా ఉండి ఉండేది.

అలాగే సినిమాలో మెయిన్ విలన్ కూడా వీక్ గా అనిపిస్తుంది. ఒక కనిపించని విలన్ తో యుద్ధం అంత రంజుగా అనిపించదు. ఇంకా సెకాండఫ్ లో కొంచెం మూమెంట్స్ డల్ అయ్యాయి. క్లైమాక్స్ కి వచ్చేవరకు కూడా కథనం సోసో గా సాగుతుంది. తర్వాత పికప్ అయ్యింది.

ఇక కియార అద్వానీకి మరీ అంత స్కోప్ కనిపించలేదు. అనీల్ కపూర్ రోల్ కూడా మొదట్లో బానే అనిపిస్తుంది కానీ తర్వాత ఫోర్సెడ్ గా ఇరికించిన భావన కలుగక మానదు. అలాగే ఎన్టీఆర్ పాత్రని ఇంకా బాగా డిజైన్ చేయాల్సింది. ఒక రొటీన్ నెగిటివ్ టు పాజిటివ్ రోల్ గా తన పాత్ర ఇది వరకు చూసినట్టే అనిపిస్తుంది. ఇంకా అన్ని యాక్షన్ సీన్స్ పర్వాలేదు కానీ సెకండాఫ్ లో ఓ యాక్షన్ సీన్ మాత్రం చాలా సిల్లీగా అనిపిస్తుంది. హృతిక్ ని తారక్ ఛేజ్ చేసే ఆ సీక్వెన్స్ ఎందుకలా డిజైన్ చేశారో మేకర్స్ కే తెలియాలి.

సాంకేతిక వర్గం:

సినిమాలో నిర్మాణ విలువలు బాగున్నాయి. యాక్షన్ పార్ట్ వరకు భారీ మొత్తంలో ఖర్చు పెట్టారు. యాక్షన్ కొరియోగ్రఫీ, సినిమాటోగ్రఫీలు బాగున్నాయి. అలాగే ప్రీతం మ్యూజిక్ బాగా వర్క్ అయ్యింది. సినిమాలో ఎడిటింగ్ కొన్ని సన్నివేశాల్లో బాగా చేయాల్సింది.

ఇక దర్శకుడు అయాన్ ముఖర్జీ విషయానికి వస్తే.. ఆదిత్య చోప్రా ఇచ్చిన కథకి డీసెంట్ కథనంతో బాగానే నడిపించారు అని చెప్పవచ్చు. ముఖ్యంగా ఇద్దరు హీరోస్ ని తను హ్యాండిల్ చేసిన విధానం చాలా బాగుంది. ఒకింత చెప్పాలంటే తారక్ విషయంలో మరింత జాగ్రత్త తీసుకున్నారు. తెలుగు ఆడియెన్స్, ఎన్టీఆర్ అభిమానులుని దృష్టిలో పెట్టుకొని డిజైన్ చేసిన సీన్స్ కానీ స్పెషల్ స్కోర్ కానీ ఇంప్రెస్ చేస్తాయి. అయితే మిగితా కథనంలో మాత్రం ఇంకా జాగ్రత్త పడాల్సింది. ఇంట్రెస్టింగ్ ట్విస్ట్ లు తర్వాత కథనం రొటీన్ ఫీల్ కలుగుతుంది. ముఖ్యంగా సెకాండాఫ్ లో కొంచెం కేర్ తీసుకోవాల్సింది.

తీర్పు: 

ఇక మొత్తంగా చూసినట్టు అయితే ఈ ‘వార్ 2’ ఇరు హీరోల లవర్స్ కి యాక్షన్ ప్యాక్డ్ ట్రీట్ అని చెప్పవచ్చు. కొంచెం కంటెంట్ పైన కూడా మరికాస్త దృష్టి పెట్టుంటే బాగుండేది. అయితే లాజిక్స్ తో పెద్దగా సంబంధం లేకుండా ఇరు హీరోల హోరాహోరీ వార్ సాలిడ్ యాక్షన్ ఎలిమెంట్స్ తో చూడాలి అనుకునేవారికి వార్ 2 డీసెంట్ గా అనిపిస్తుంది.

123telugu.com Rating: 3/5

Reviewed by 123telugu Team