టాలీవుడ్ బ్లాక్ బస్టర్ చిత్రాల దర్శకుడు ఎస్.ఎస్ రాజమౌళి దర్శకత్వంలో వచ్చిన ‘ ఈగ’ సినిమా ద్వారా తెలుగు వారికి బాగా సుపరిచితుడైపోయిన కన్నడ సూపర్ స్టార్ సుధీప్. కన్నడలో సూపర్ స్టార్ ఇమేజ్ ఉన్న సుధీప్ ఒక్క ఈగ సినిమాతోనే తెలుగు ప్రేక్షకుల అభిమానాన్ని గెలుచుకున్నారు. ఈగ విజయం తర్వాత సుధీప్ కి టాలీవుడ్ నుంచి చాలా అవకాశాలు వస్తున్నాయి. తెలుగులో సుదీప్ చేయబోయే రెండవ సినిమా ఏమిటా అనే విషయానికి తెరపడింది. అల్లరి నరేష్ ప్రధాన పాత్రలో తెరకెక్కుతున్న ‘యాక్షన్’ సినిమాలో ఒక కీలక పాత్ర పోషించడానికి సుధీప్ అంగీకారం తెలిపారు. 3డిలో తెరకెక్కుతున్న ఈ కామెడీ ఎంటర్టైనర్ కి అనిల్ సుంకర దర్శకత్వం వహిస్తున్నారు. ఈ సినిమాని ఒకే సారి తెలుగు మరియు తమిళ భాషల్లో చిత్రీకరిస్తున్నారు. తమిళంలో ‘ఆసు రాజు రాణి జోకర్’ అనే పేరుతో విడుదల చేస్తున్నారు. ఇప్పటికే చాలా వరకూ చిత్రీకరణ జరుపుకున్న ఈ సినిమాలో అల్లరి నరేష్ తో పాటు వైభవ్, ‘కిక్’ శ్యాం, రాజు సుందరం, స్నేహ ఉల్లాల్, నీలం ఉపాధ్యాయ్ మరియు కామ్న జఠ్మలాని ప్రధాన పాత్రలు పోషిస్తున్నారు. తండ్రీ కొడుకులైన బప్పి లహరి -బప్పా లహరి కలిసి ఈ సినిమాకి సంగీతం అందిస్తున్నారు.