తాజా బ్లాక్‌బస్టర్ “OG” విజయోత్సవ వేడుకలో పవర్ స్టార్ పవన్ కళ్యాణ్ చాలా ప్రశాంతంగా కనిపించారు. మొత్తం మూవీ టీమ్ ఈ వేడుకలో పాల్గొనగా, పవన్ కళ్యాణ్ గంటపాటు ప్రసంగించి పలు ముఖ్యమైన అంశాలపై తన అభిప్రాయాలు పంచుకున్నారు.
అందులో ముఖ్యంగా తన అభిమానులకు, అలాగే ఇతర హీరోల అభిమానులకు ఆయన ఇచ్చిన సందేశం హైలైట్ అయింది. ఫ్యాన్ వార్స్‌కి ముగింపు పలకాలని ఆయన గట్టిగా కోరారు. సోషల్ మీడియాలో ఒక సినిమాకు విజయమా, పరాజయమా అన్న దానిపై అభిమానులు పరస్పరం ఒకరినొకరు, తమ అభిమాన హీరోలను నిందించడం సరికాదని పవన్ స్పష్టం చేశారు.
“మీకు వెనుక జరుగుతున్న కష్టాలు తెలియకపోవచ్చు. చాలా మంది తమ కుటుంబాల నుండి దూరంగా పనిచేస్తున్నారు. దర్శకుడు సుజీత్ తన భార్య, బిడ్డను నెలన్నర రోజులు చూడలేదు. కానీ మీరు మాత్రం ఫ్యాన్ వార్స్‌లో మునిగిపోతున్నారు. దయచేసి నా అభిమానులు మాత్రమే కాదు, ఇతర హీరోల అభిమానులు కూడా ఇలాంటి పనులు ఆపండి. ఒకప్పుడు సినిమాలు 100 రోజులు నడిస్తే, ఇప్పుడు ఆరు రోజులకే ముగుస్తోంది. సినిమా చంపొద్దు, ఒకరినొకరు మెచ్చుకోండి” అని పవన్ విజ్ఞప్తి చేశారు. ఈ మాటలు అక్కడున్నవారిని బాగా ఆకట్టుకున్నాయి. అయితే ఆయన మాటలను అభిమానులు నిజంగా ఆచరణలో పెడతారా అన్నది మిలియన్ డాలర్ ప్రశ్నగా మిగిలింది.