మలయాళంలో కళ్యాణి ప్రియదర్శన్ నటించిన ‘కొత్త లోక చాప్టర్ 1 – చంద్ర’ తెలుగులోనూ సాలిడ్‌గా దూసుకెళ్తోంది. వర్కింగ్ డేస్‌లో కూడా ఈ సినిమా జోరు కొనసాగిస్తోంది. మంగళవారం వసూళ్లు, సోమవారంతో పోలిస్తే ఎక్కువగా రావడం సినిమా లాంగ్ రన్‌కు సెట్ అవుతోందని చూపిస్తోంది. దుల్కర్ సల్మాన్ నిర్మించిన ఈ చిత్రం, ఇప్పుడు పెద్ద మైలురాయిని అందుకుంది.
లోక ప్రస్తుతం సౌత్‌లో లేడీ ఓరియంటెడ్ మూవీస్‌లో ఆల్‌టైమ్ హయ్యెస్ట్ గ్రాసర్‌గా నిలిచింది. రిలీజ్‌ అయిన ఆరు రోజుల్లోనే రూ.93 కోట్ల గ్రాస్ వసూలు చేసింది. ఈ రికార్డు ఇంతకుముందు కీర్తి సురేష్ నటించిన ‘మహానటి’ పేరిట ఉండేది. నాగ్ అశ్విన్ దర్శకత్వం, వైజయంతీ మూవీస్ నిర్మాణంలో వచ్చిన ఆ బయోపిక్ 2018లో విడుదలై ప్రపంచవ్యాప్తంగా రూ.85 కోట్ల గ్రాస్ వసూలు చేసి మైలురాయిగా నిలిచింది.
ఏడు సంవత్సరాల తర్వాత ఆ రికార్డును ఇప్పుడు మాలీవుడ్ సూపర్ హీరో డ్రామా లోక బద్దలు కొట్టింది. డొమినిక్ అరుణ్ దర్శకత్వం వహించిన ఈ చిత్రంలో నస్లెన్, శాండీ కీలక పాత్రలు పోషించారు. తెలుగులో ఈ సినిమాను నాగ వంశీ సితార ఎంటర్‌టైన్‌మెంట్స్ బ్యానర్‌పై విడుదల చేశారు.
