‘గ్రీకువీరుడు’ సినిమాకుగానూ థమన్ అందించిన సంగీతానికి దర్శకుడు దశరధ్ చాలా సంతృప్తి చెందాడు. ఈ సినిమా పోస్ట్ ప్రొడక్షన్ కూడా ముగిసింది. థమన్ కూడా నేపధ్య సంగీత పనులు ముగించాడు. ఆఖరి కాపీ చూసాక అమితానందంతో దశరధ్ తన ట్విట్టర్లో థమన్ ఈ సినిమాను మరో ఎత్తుకి తీసుకెళ్లాడని తెలిపారు. ఈ ఏడాది ‘నాయక్’, ‘బాద్ షా’ వంటి భారీ సినిమాలే కాక ‘జబర్దస్త్’ లాంటి ఎంటర్టైనర్ సినిమాలకూ థమన్ మంచి సంగీతాన్ని అందించాడు. దీనికి జతగా తమన్ అందించిన నేపధ్య సంగీతం ఈ సినిమాకి ప్రధాన బలమని దశరధ్ తెలిపాడు.
నాగార్జున ‘గ్రీకువీరుడిగా’ కనిపించగా అతని సరసన నయనతార నటించింది. మీరా చోప్రా, ఎం.ఎస్ నారాయణ, బ్రహ్మానందం, కె. విశ్వనాద్ ముఖ్య పాత్రలలో కనిపిస్తారు. కామాక్షి కళా మూవీస్ బ్యానర్ పై డి. శివప్రసాద్ రెడ్డి ఈ సినిమాని నిర్మిస్తున్నారు. “ఈ సినిమా ఏప్రిల్ 26న విడుదల కానుంది. ఈ చిత్రం మొదటికాపీ సిద్దమయింది. పాటలకు మంచి స్పందన వచ్చింది. త్వరలోనే ప్లాటినం డిస్క్ ఫంక్షన్ నిర్వహిస్తాం . ఈ సినిమా అందరికీ తప్పకుండా నచ్చుతుందని” నిర్మాత తెలిపారు. ఈ సినిమాకి అనిల్ బండారి సినిమాటోగ్రాఫర్.