ఆంధ్రప్రదేశ్ ఫారెస్ట్ డిపార్ట్‌మెంట్, డిప్యూటీ సీఎం పవన్ కళ్యాణ్ మద్దతుతో నవదీప్ పల్లపొలి, సాయి దుర్గ తేజ్ సమర్పణలో శ్రీకాంత్ మన్నెపురి రూపొందించిన ‘డిస్కవర్ ఆంధ్ర’ డాక్యుమెంటరీ టైటిల్ గ్లింప్స్‌ గ్రాండ్‌గా లాంచ్ అయింది. పడాల సురేందర్ రెడ్డి, శ్రావ్య కూనం ఈ ప్రాజెక్ట్‌ను నిర్మిస్తున్నారు.
ఈ సందర్భంగా సాయి దుర్గ తేజ్ మాట్లాడుతూ.. ‘ఆంధ్రలోని వైల్డ్‌లైఫ్, ప్రకృతి వైభవాన్ని అద్భుతంగా చూపించినందుకు శ్రీకాంత్‌కు కృతజ్ఞతలు. 2020లో పర్యావరణంపై అవగాహన పెరిగిన తర్వాత, ‘గ్రీన్ పాస్’ ఎన్జీవో ద్వారా బీచ్ క్లీనింగ్, కోస్టల్ ప్రొటెక్షన్ కార్యక్రమాలు చేస్తున్నాం. మన సంస్కృతి, ప్రకృతి రక్షణలో ప్రతి ఒక్కరూ బాధ్యత తీసుకోవాలి. ‘డిస్కవర్ ఆంధ్ర’ అందుకు స్ఫూర్తి కలిగించే ప్రాజెక్ట్’ అని అన్నారు.
నవదీప్ మాట్లాడుతూ.. ‘2014లో ప్రారంభమైన శ్రీకాంత్ ప్రయాణం ఎంత గొప్పదో తన విజువల్స్ చూసిన తర్వాత తెలిసింది. ఆ విజువల్స్ సాయి దుర్గ తేజ్‌ని ఆకట్టుకోవడంతో, ఆయన డిప్యూటీ సీఎం పవన్ కళ్యాణ్‌తో కలిపి అవసరమైన సహకారం అందేలా చేశారు. 72 నిమిషాల నిడివితో రూపొందించిన ఈ డాక్యుమెంటరీ ఆంధ్రలో ఉన్న అపారమైన ప్రకృతి అద్భుతాలను ప్రపంచానికి పరిచయం చేస్తుంది.’ అని తెలిపారు.
శ్రీకాంత్ మన్నెపురి మాట్లాడుతూ.. ‘ఫారెస్ట్ డిపార్ట్‌మెంట్‌లో వాలంటీర్‌గా పనిచేసిన తరువాత మన రాష్ట్రంలో ఎన్నో అద్భుతాలు ఉన్నాయని తెలుసుకుని, ఈ ప్రాజెక్ట్ చేయాలనే నిర్ణయం తీసుకున్నాను. “వైల్డ్‌లైఫ్ అంటే ఆంధ్ర గుర్తుకు రావాలి” అన్నది ఈ డాక్యుమెంటరీ లక్ష్యం. పవన్ కళ్యాణ్, నవదీప్, సాయి దుర్గ తేజ్, మణిశర్మ అందించిన సహకారం పట్ల కృతజ్ఞతలు తెలియజేస్తున్నాను.’ అని అన్నారు.